Ngepeng sikit2

02 July 2011

Satu anugerah.

"Dey lagi nih... dey dey," Pokka royak dale hati. Minyok RXZ tu Pokka preh sapa habih. Kih lamo tok bubuh minyok 2T, sebih enjin denga minyok ite toksoh royak la, Pokka raso srupo preh keto galo. Kaba-kaba Pidah Jongeng dok nimbe tepi Pokka naik Honda Samah sambil bawok petai sebeloh tange. Kaba-kaba tok kaba. Nate budok tok betul tu ajok racing pulok. Pidah sengeh, muko napok supo kudo nok bapok. Pokka malah basso. Kalu buleh nyo jek Pidah paka kasut Docmart dio bedamai muko nate budok sewel tu. Takdoh doh la Pidah Jongeng, jadi timbul Pidah Gusi pulok. Pokka malah baso. Ado hal lagi urgent dari nok ngejek muko Pidah Jongeng, tamboh dengan Pokka tok paka Docmart sejak jame dio tukar scene dari Skinhead-tok-baligh ko Wings-Search-DoubleTrouble. Ado sekali Pokka parok nge boss dio paka Docmart bene meroh wak gi cedung. Pokka nok triok dale ati sero maso tuh. Tapi loni Pokka tengoh preh muto Z lebih pado dio monggek tino mulo. Tapi metar abih sapa 60 jah.

"Tahik eh!!!", Pokka nepik sore. Dio preh muto sambil tunduk. Amid Karong ajar dio mulo, tunduk maso bawok muto ni lebih aerodinamik. Kure beban enjin tuh. Sikit lagi nok sapa keda Mokjah. Nasik lemok Mokjah.... lamo doh Pokka ngide nok make. Tamboh-tamboh arini Mokjah baru bukok semula keda lepah lamo tummo tutup. Jak dari Mokjah gi naik aji, lepah tu redecor nok besa keda lagi, stop semeta kih Haji Che We, tok laki Mokjah brigak nikoh so lagi, cukup 4 ore bini dio. Mokjah panah peda, dio wak peranga nok tutup keda make dio. Lamo kakloh la, sapa bunyi ado ore nok beli tapok keda dio. Mujo Haji Che We panda, dio bui keto Proton Perdana sebutir ko Mokjah tamboh denga ore gaji Indon sore dok rumoh dio. Sengeh pah ko medula oblongata Mokjah. Loni Mokjah dok jajo cito tok laki dio tu baik, banyok duit, tok apolah nikoh rama pun. Padahal Mokjah Nasik Lemok tu bini nombo duo. Haji Che We tu pero gapo tok tahu, biso gitumo.


Mokjah duk tebek dio nok buat promosi. Kalu gi beli nasik lemok dio ari pembukaan semula pagi tu, dio bui sebukuh nasik lemok free. Nasik Lemok Mokjah ni sikit lagi nok masuk Jalan-Jalan Cari makan tapi aloh tipis ko D'village, tapi kih D'village ni lagi terkenal kih dokto-dokto nge misi USM dok make situ. Kalu lambat sikit lagi ni Pokka takut nasik lemok dio abih. Nyo buleh bangun lambat pagi tadi kih semale ralit dok nalipon tino anok sekoloh hok Pokka ngejah paka Facebook nak-nak ari paka PC sain dio, Aime. Setting molek doh maring, male ni tido awal... male ni tido awal.... tapi buleh budok tingakte 4 semale tu dok kecek pasa Suwih Telo mugo gapo Pokka pun tok tahu. Suwih Telo ko Telo Suwih ko Suwih ubi Setelor ko, Pokka oyak hor jah. Hor bewok.


Sapa jah keda nasik lemok Mokjah tu, Pokka kelih ore rama doh mejo. Penuh doh keda. Pokka wak keputusan nok beli bukuh jah. Make atah wokah atah baruh abah dio pun sdak jugok. Nasik lemok so, free so, tamboh nge neslo beng. "Meme jadii.....," Pokka dok ngoya semeta. Nok masuk keda tu, Pokka dok jenguk jenguk palo dok ita nasik ado banyok lagi ko dok. Tengoh dok menzirafah ado ore sound dio, "Beratur la beb, orang lain pun nak brekfast jugak.." soro budok tino. Pokka kena tue soro tu, adik pado Sleme Tupai. Pokka paling ko budo tu sambil sengeh-sengeh. Baru tigo bule dok Matrik Melako, panda doh sound ore tuo paka bahaso lua. "Mujo mu comey Wati...", Pokka mikir jugok. Dio gi beratur blake skali. Tengoh dok beratur tu boss dio atar msg ...'beli nasik lemok ko abah so, tokde nok pese tadi napok gaduh dok stat muto. wassalam.' Pokka kiro kiro duit, cukup cukup.


Mujolah Stopa anok Mokjah hok bukuh nasik lemok tu meme pro dale selok-belok pembungkusan nasik lemak. Pokka beso doh mari keda Mokjah ni mulo. Sebukuh nasik lemok dio buleh buat bawoh 30 saat, kecuali kalu ado ore banyok songeh mitok pelek-pelek. Nasik lemok stended meme antara 25 sapa 28 saat jah dio buat. Loni Pokka ore no 4, beratur dari ore no 30 lagi. Pokka kagum denga diri dio sendiri. "Demi nasik lemak Mokjah, I sanggup...." Pokka speaking dale ati. Dok sedak sedak beratur, tibo tibo jadi gegey depe. Pokka jenguk palo, napok ore dok bekeng tepat bukuh nasik. "Aku mintak tiga bungkus je la mangkuk, ni apesal bagi 4 ni? Nak berkias dengan aku ek. Berkias bulan april baru nak bayar duit aku?" Baso Monkey d Luki buat peranga supo skalo. Pokka malah basso. Ore lain pun malah basso.


Loni sapa doh giliran Pokka. Stopa tengoh tengoh ready doh nok bukuh nasik. "Nasik lemok 2 bukuh, free so dih Pa?" Pokka royak order sambil-sambil tego Stopa anok Mokjah. Stopa napok pelek, " Sini buke tepat nasik lemok Ka, nuh mejo sano nuh baru nasik lemok." Stopa tunjuk paka sodek nasik. Pokka paling palo dio, napok mejo wak Stopa tunjuk. Mejo licin, Mokjah dok sapu mejo paka kain buruk. Takdok go satu pun atah mejo. Belake sikit ado napok baye baye ore dok akat puyuk. Jauh jauh lagi Pokka buleh bau nasik lemok dari puyuk wak ore akat tuh. "Sini kawe bukuh nasik belauk jah, Ka. Napok supo abih doh nasik lemok tuh." Stopa anok Mokjoh bui penerangan. "Burikkkkkkkkkkkkkkkk!!!!!!", Pokka dok jerit dale keda Mokjoh.


Dari ari tu, Pokka lekat namo Pokka Burik.

3 comments:

power power said...

hHhahaha.. sapo pokka tu?
sek skinhead kb dulu ko?

sang helang said...

tu la... aku kato doh.. misti ado konspirasi ni.. wi 4 bukuh.. nk suruh bayar la tu

Anonymous said...

hua hua hua...

Iklan Berbayar